Foto:Shutterstock
Dugotrajno sjedenje prekrštenih nogu bi trebalo izbjegavati zato što ono može izazvati neravnomjerno opterećenje kukova, karlice i donjeg dijela leđa.
Osteopatkinja Anita Joshi, koja ima dvije decenije kliničkog iskustva, objasnila je da je glavni problem u asimetriji. Kada se sjedi prekrštenih nogu, jedan kuk se rotira dok drugi ostaje u neutralnijem položaju pa jedna strana karlice, kuka i donjeg dijela leđa radi drugačije od druge. Stručnjakinja upozorava i na uticaj na cirkulaciju. Prebacivanje noge preko koljena može privremeno povećati krvni pritisak, jer gornja noga vrši pritisak na vene donje noge.
Kao bolju osnovu za sjedenje navela je položaj u kojem su oba stopala ravno na podu, koljena približno u visini kukova ili niže, a donji dio leđa lagano oslonjen. Ipak, naglašava da je od “savršenog” položaja važnije redovno mijenjanje držanja.
„Važnije od pronalaska ‘savršenog’ položaja jeste da ga redovno mijenjate. Čak i ako to znači da prebacite težinu, ispružite noge ili ustanete na nekoliko minuta svakih 30 do 40 minuta”, rekla je Joshi.
Ona ističe da problem nije samo u načinu sjedenja nego u dugotrajnoj nepokretnosti, jer tada mišići počinju da se zamaraju, cirkulacija usporava, a zglobovi ne dobijaju kretanje koje im je potrebno da ostanu zdravi.
Izvor:DAN
