Ruski UFC borac Habib Nurmagomedov ima ozbiljne planove za eventualni meč sa bokserskom legendom, Flojdom Mejvederom.
Nurmagomedov je nedavno predložio Mejvederu da se, kako neporaženi borci u svojim kategorijama, konačno susretnu i bore za titulu šampiona, rekavši kako “u džungli ima mjesta samo za jednog kralja”.
“Hajde da se borimo! 50-0 protiv 27-0. Obojica nikad nismo izgubili, što da ne? Hajde! U ovoj džungli ima mjesta samo za jednog kralja. On nije mogao da sruši Mekgregora, a ja sam to uradio veoma lako”, poručio je nedavno Nurmagomedov.
On je aludirao na borbu između Makgregora i Mejvedera u avgustu koju je Amerikanac dobio desetoj rundi.
Otac Nurmagomedova, Abdulmanap, otkrio je agenciji TASS da će njegov sin imati mnogo veće šanse za uspjeh ako do borbe dođe. Želja mu je da ga za taj meč sprema niko drugi do Majk Tajson.
“Habib će imati mnogo veće šanse kao bokser. Svakako veće nego Makgregor. On se neće ustručavati da uđe u klinč. Volio bih da u našem trenerskom timu budu Anatolij Lomačenko i Majk Tajson”, rekao je Nurmagomedov senior.
Kada je riječ o Tajsonu, on u prošlosti nije imao previše simpatija za Mejvedera. Nazvao ga je “uplašenim malim čovjekom” i to pošto se Mejveder proglasio većim od Mohameda Alija.
Procjena je da bi do meča Nurmagomedova i Mejvedera moglo vrlo lako da dođe. Flojd je nedavno najavio aktivaciju iz penzije kako bi se opet borio sa Manuom Pakijaom, ali mu je želja da prije toga ima jedan meč kao zagrijavanje.
