Fudbaleri Liverpula pobijedili su Totenhem sa 1:2 (0:2) u derbiju 15. kola Premijer lige koji je odigran na stadionu u Londonu.
Liverpul je bio tim koji je znatno bolje otvorio duel. Imali su posjed, nekolicinu dobrih napada preko Darvina Nunjeza koji je često imao dosta prostora između Lenglea i Dajera.
Upravo u jednoj takvoj situaciji, Urugvajac prihvata loptu, gleda ka Mohamedu Salahu, proigrava ga, a Liverpulov najplaćeniji igrač trese mrežu Uga Lorisa na veoma lijep način.
Išlo je ka tome da gosti odu na poluvrijeme s minimalnom prednošću, a onda je jednu, naizgled rutinsku loptu, Erik Dajer pretvorio u gol-šansu za Mohameda Salaha. Egipćanin je izašao sam na Lorisa, lako ga prebacio i došao do svog novog gola protiv Totenhema.
Mnogo bolje je igrao tim Antonija Kontea u nastavku, a posebno kada je na teren ušao Dejan Kuluševski kojem je samo minut bio neophodan da upiše asistenciju. Lijep pas za Harija Kejna koji iz teške situacije matira golmana.
Ipak, tri boda otišla su u Merzisajd i tako je Liverpul nastavio tradicionalno dobro da igra protiv Totenhema.


